Kjo monografi i dedikohet jetës dhe veprës të humanistit, filozofit e profesorit Nikolla Leonik Tomeo (Nicola Leonicus Thomaeus) me origjinë nga Durrësi. Ai duke shpjeguar Aristotelin, Platonin dhe autorët e tjerë të Greqisë antike në gjuhën origjinale u bë qysh në fillim një nga personalitetet më të shquara në humanizmin italian dhe atë evropian.
Me kontributin e tij të shumanshëm në fushat e dijes dhe të artit u cilësua nga Erazmi i Roterdamit si një pishtar i shquar i atij shekulli. Emri i Tomeos është i lidhur me një numur të madh humanistësh anglezë të rangut të parë por edhe me zbulimet e famëshme të Kopernikut dhe Galileo Galileit.
Vepra e re ndërsa plotëson një boshllëk shekullor në kulturën shqiptare, synon gjithashtu të nxitë studimet e sotme albanologjike në fushën e hulumtimeve të Rilindjes evropiane, të cilat mbartin në vetvete vlera të shumëanëshme informative dhe formative për të gjitha brezat.